تأثير الكورونا على جوانب حياتي
في السابع والعشرين من شهر مارس، تم فرض حظر التجوال في جميع أنحاء الجمهورية للحد من انتشار فيروس كورونا المستجد. يعم الهدوء في جميع أنحاء البلد من الساعة السادسة مساءًا حتى السادسة صباحًا في اليوم التالي
القصص التي نشاركها معكم هي قصص رواها أعضاء مجتمع الجامعة الأمريكية يعبرون عن كل ما يشعرون به إثر فيروس كورونا المستجد وكل الإجراءات الاحترازية التي تتخذها البلاد،ليخبروا الجميع كيف يقضون يومهم أثناء العزل المنزلي وعن تجربتهم مع التعلم عن بعد
في تلك الفترة، نود أن نوثق كل يوم وكل لحظة نمر بها، لذلك نرغب في أن نستمع إلى مجتمع الجامعة كله من الطلاب إلى أعضاء هيئة التدريس
إن كنت ترغب في مشاركة قصتك معنا، راسلنا على
اليوم الخامس والعشرين: ٢٠ أبريل٢٠٢٠
عدد الإصابات في العالم: ٢،٤٩٦،٦٦٠
عدد الوفيات في العالم: ١٧١،٢٤٠
عدد الإصابات في مصر: ٣٣٣٣
عدد الوفيات في مصر: ٢٥٠
كتب: علي عبدالله
مساعد مكتب في قسم الصحافة والإعلام
.لو هنتكلم عن تأثير الكورونا والحظر على حياتنا بشكل عام، مش هيكفيني سنة إني أعبر عن التأثيرات السلبية للفيروس المنتشر في جميع دول العالم
.يكفيني اني اتكلم عن عن نفسي تأثيره على جوانب حياتي؛ الجانب المادي والجانب النفسي والجانب الإجتماعي وده بالنسبة ليا وللناس اللي زيي
في بداية ظهور الفيروس في مصر، جاتلي حالة من الذعر ان الفيروس يقرب مني أو من اللي حوليا لدرجة اني وصلت لحالة فوبيا من كل شيء حواليا وكل شويه أقوم أغسل أيدى بالصابون وأطهر البيت بالكلور .. ولو خرجت اشتري حاجه من برّا بلبس ماسك وجوانتي
.وده بيشكل ضغط عليا عشان محتاج فلوس أشتري بيها الحاجات دي بجانب متطلبات البيت وأنا راجل كنت شغال وبحب الشغل ومش متعود علي قعدة البيت
.والشغل، بغض النظر عن الماديات، بيمثلي الحياة والكرامة وتعبير عن الذات وإثبات إني عايش وبتعايش مع المجتمع اللي أنا فيه
فما بالك بقى إن الشغل ده قوتي وقوت عيالي والمرتب اللي كنت باخده عليه بجانب “الأڤر تايم” كنت بالكاد بعيش بيه عشان أعرف أقوم بوجباتي المنزليه تجاه الأسرة ومتطلبات الحياة اليومية
أنا دلوقتي باخد ٦٠٪ من اللي كنت باخده قبل انتشار الفيروس وحالة الحظر اللي بتمر بيها البلاد..وشكلي بقى وحش قدام المدام عشان حاسس بتقصير غير مسؤول عنه في التزاماتي المادية والقدرة على تلبية إحتياجات المنزل
.وفكرت إني اشتغل أي حاجة عشان أحسن من داخلي ولكن كل الأبواب مغلقه عشان المرحلة الصعبة اللي بتمر بها البلاد من حالة ركود وغلق جميع الأنشطة الاقتصادية والتجارية
.وبالتالي، أنا بمر بمرحلة صعبة من حالة العزل المنزلي وعدم القدرة ع الخروج “واللي ببات فيه بصحى فيه” وحاله ملل مسيطرة عليا تماما
ولكن على الرغم من كل السلبيات اللي ممكن أكون معرفتش أعبر عنها بالكامل، الجانب الإيجابي هو تواصلي وقربي من أولادي وقعدتي معاهم فترة كبيرة جدا في اليوم وكمان لقيت فرصة إني أقرب من ربنا أكثر
.وختامًا، ادعوا الله أن يكشف الغمة ويرفع عنا البلاء عشان تعود الحياة الطبيعية والمعتادة ونرجع نقصي التزاماتنا
For The Caravan’s previous diary entries in Arabic and English go to our COVID-19 Special Coverage page.
